1953 konchi tripantu mew puwi Europa mapu tüfachi wentru, kiñe beca ñi duam tañi elueetew Italiano Gobierno, tañi zoy alü amuam tañi kimün widükan küdaw mew, Richard Ginori, Sexto Florentino pingechi chillkatuwemu, Florencia wariamu.
Ka femuechi, ayüy tañi mülekayael üyepüle, fey amuy Chaleri pingechi wariamu, Bélgica. Feymu dewmapuy pichiken küdaw ka adelkapufi Kapilla Les Petits Faucault. Fey wüla fey amuy Paris wariamu, Francia. Feymu kelluntukupufi George Jouve widükan ka mümülkan küdaw mew. Feychi tripantumu kimpufi ka rume witrankontupufi epu adentukafe Constantin Brancusi ka Ossip Zadquine.
Tañi wenüy dewmakelu adentun, Dominique Baudart, walüng antü mew yekefuy ñi taller Vallauris wariamu, fey ta yeeyu tüfeychi wariamu chew ta kimpufi kiñe kurewen fendekefilu Picasso ñi adentun, George ka Suzane Ramie pingefuyngu. Picasso engu pewi Taller Madoura mew, ti epu kurewen tañi taller ürke tüfa. Feychimu trawülu Picasso engu fey ta elungerkey küla chemkün, “El Beso”, “La Gallina”, ka “Toro” pingeyechi puke chemkün. Picasso kay rume ayüñmarkeeyu ñi Ngülernaküm wirin küdaw, ñi miawlel ta Eugenio. Tüfachi puke adentun ta Viña del Mar trokiñche adentufe tañi küdaw ürke, tañi miawlel ta Eugenio, tañi pengelpuafeil ta Europa.
Tañi pengelngeam tüfachi pu Chileno ñi küdaw, Picasso kintuy chew ta aretufi la Salle de la Mairie ruka, fey epu mari konchi agosto küyenmu llituy ñi pengelngen ka wechuy küla mari kiñe konchi feychi küyenmu, 1954 konchi tripantu mew, ka feychimu Pablo Picasso ka Eduuard Pignon ñi mümülkan küdaw pengelniengerkey feychi ruka mew.
Wechulu chi pengel adentun, Picasso ngillay Jorge Quevedo tañi kiñe ngülernaküm wirin adentun küdaw.
